မန္တလေးမြို့၌ ယာဉ်ထိန်းရဲ တပ်ဖွဲ့ဝင် တစ်ဦးအား ဆိုင်ကယ် မောင်းနှင်လာသူမှ ဓားနှင့်ထိုး သတ်မှုကြောင့် ယာဉ်ထိန်း ရဲတပ်ဖွဲ့မှ ရဲတပ်ဖွဲ့ဝင် တစ်ဦး စက်တင်ဘာ ၂၄ ရက်က သေဆုံးခဲ့ရသည်။
အဆိုပါ ယာဉ်ထိန်းရဲ သေဆုံးခဲ့သည့် သတင်း ဓာတ်ပုံများ လူမှုကွန်ရက် ပေါ်တွင် ပျံနှံ့ခဲ့သလို လူသတ်တရားခံ အဖြစ် စွပ်စွဲခံထားခဲ့ရသူနှင့် ပတ်သက်သည့် ဓာတ်ပုံများ၊ ဝေဖန် စကားပြောဆိုသံများ ပျံနှံ့ခဲ့သည်။
အဆိုပါ လူသတ်မှုနှင့် ပတ်သက်၍ လူသတ်သမားဟု စွပ်စွဲခံထားရသူ အနေဖြင့် အရက်သေစာ သောက်စားမူးရစ်နေပြီး ဓားဖြင့် ထိုးခဲ့ခြင်းဖြစ်သည်ဟူ၍ လည်းကောင်း၊ ယာဉ်ထိန်းရဲက စတင်၍ ကိုယ်ထိလက်ရောက် ကျူးလွန်ခဲ့သည် ဟူ၍ လည်းကောင်း ဝေဖန်မှုများစွာ ထွက်ပေါ်လာခဲ့သည်။
အခင်းဖြစ်ပွားပုံ
မန္တလေး တိုင်းဒေသကြီး အောင်မြေသာစံ မြို့နယ် ၁၉လမ်း မီးပွိုင့်တွင် စက်တင်ဘာ ၂၄ရက် နံနက်ပိုင်းတွင် ယာဉ်စည်းကမ်း လမ်းစည်းကမ်း စစ်ဆေးရန် တာဝန် ထမ်းဆောင်နေစဉ် ဆိုင်ကယ် စီးနင်းလာသူ ဦးလှမျိုးထွန်း ဆိုသူ၏ ဆိုင်ကယ်အား စစ်ဆေးရာတွင် ဦးလှမျိုးထွန်းထံမှ ယာဉ်မောင်း လိုင်စင်နှင့် ဆိုင်ကယ် လိုင်စင်တို့အား တောင်းခံရာတွင် ယာဉ်လိုင်စင်(အ၀ိုင်း) မပါသဖြင့် ယာဉ်မောင်း လိုင်စင်အား သိမ်းယူပြီး ချလံဖြတ်ခိုင်းရာ စကား အချေအတင်များခဲ့ပြီး ကိုလှမျိုးထွန်း ဆိုသူက ချလံမဖြတ်ဘဲ ပြန်သွားခဲ့ကာ အစ်ကိုဖြစ်သူ ဒေါက်တာလှစိုးထွန်း နှင့်အတူ ပြန်လည်ရောက်ရှိ လာပြီး ဆက်လက်၍ သိမ်းထားသည့် ယာဉ်မောင်း လိုင်စင်အား ပြန်လည် တောင်းယူကာ ချလံ မဖြတ်နိုင်ကြောင်း အချင်းများ ရန်ဖြစ်ခဲ့ရာမှ ကိုလှမျိုးထွန်းက လက်သီးနှင့် ထိုး၍ တိမ်းရှောင်ရာ လဲကျသွားသော ရဲတပ်သား ကျော်ဇင်ဦးကို အစ်ကိုဖြစ်သူ ဒေါက်တာလှစိုးထွန်းက ပါလာသော ဓားဖြင့် ထိုးခဲ့ခြင်းကြောင့် ယာဉ်ထိန်း ရဲတပ်သား ကျော်ဇင်ဦး သေဆုံးခဲ့ခြင်း ဖြစ်သည်။
စွပ်စွဲပြောဆို
လူသတ်တရားခံဟု စွပ်စွဲခံထားရသူ ဒေါက်တာလှစိုးထွန်းမှာ အရက်သေစာ သောက်စားထားသူ တစ်ဦး ဖြစ်ကြောင်း၊ လူသတ်ရန် တမင် ကြံစည်၍ ဓားအား ကိုင်ဆောင်ခဲ့ခြင်း ဖြစ်ကြောင်း ဝေဖန် ပြောဆိုသံများလည်း ထွက်ခဲ့သည်။
“ကျွန်တော့် သူငယ်ချင်းက လူသတ်လိုက်တယ် ဆိုပေမယ့် လွတ်ငြိမ်း ချမ်းသာခွင့်နဲ့ လွတ်လာတဲ့ တရားခံ မဟုတ်ဘူး။ နောက်ပြီး သူက ဆရာဝန်တစ်ယောက် ဖြစ်တယ်။ လွန်ခဲ့တဲ့ ရှစ်နှစ်ကျော်၊ ကျောင်းတုန်းက အရက် သောက်ခဲ့ပေမယ့် ကျောင်းတုန်းကလည်း မူးရူး ရန်ဖြစ် ရမ်းကားတယ် ဆိုတဲ့ အဖြစ်အပျက်မျိုး မရှိခဲ့ဖူးဘူး။ သူအရက်ကို ဖြတ်ခဲ့တာလည်း ခုနစ်နှစ် ကျော်သွားပါပြီ။ အရက်သောက်လို့၊ မူးရူးရမ်းကားလို့ဆိုပြီး အင်တာနက်ပေါ်မှာ တချို့က စွပ်စွဲ ပြောဆိုနေပါတယ်” ဟု ဒေါက်တာလှစိုးထွန်း၏ သူငယ်ချင်း တစ်ဦးဖြစ်သူက ရှင်းပြသည်။
ဒေါက်တာလှစိုးထွန်းမှာ ဆေးခန်း ဖွင့်လှစ်ထားသည့် ဆရာဝန်တစ်ဦး ဖြစ်ပြီး သူ၏ ညီဖြစ်သူ ဦးလှမျိုးထွန်းမှာ ရတနာပုံ တက္ကသိုလ်မှ တတိယနှစ် စီးပွားရေး ကျောင်းသားတစ်ဦး ဖြစ်ကြောင်းကိုလည်း သိရသည်။
ဓာတ်ပုံရိုက်တာက ပြဿနာ အစ
အခင်း ဖြစ်ပျက်မှုများနှင့် ပတ်သက်ပြီး ပတ်ဝန်းကျင် အသိုင်းအ၀ိုင်းမှ ထွက်ပေါ်လာသည့် စကားသံများကလည်း အဖြစ်မှန်အပေါ် ဝေခွဲရခက်မှုများ ဖြစ်ပေါ်စေခဲ့သည်။
“ပထမကတည်းက စပြီး စကားများတဲ့ ယာဉ်ထိန်းရဲ ကျော်ဇင်ဦးက အင်္ကျီကို ချွတ်ပစ်လိုက်ချိန်မှာ ဆိုင်ကယ် အဖမ်းခံရသူက လက်သီးနဲ့ လှမ်းထိုးလိုက်တယ် နောက်တစ်ယောက်ရဲ့ လက်ထဲမှာ ဓားပါတာကို မြင်တဲ့အချိန် အခြားရဲတွေက နောက်ဆုတ်သွားတယ်။ လက်သီးနဲ့ ထိုးတာကို ရှောင်လိုက်တဲ့ ယာဉ်ထိန်းရဲကတော့ ရှောင်လိုက်တဲ့ အရှိန်နဲ့ လဲအကျမှာ ဓားကိုင်ထားတဲ့ သူက နောက်ကျောကို ဓားနဲ့ ထိုးတာပါ”ဟု အောင်မြေသာစံ မြို့နယ် အမှတ်(၁) ရဲစခန်းမှ တာဝန်ရှိသူကလည်း ပြောသည်။
ယာဉ်ထိန်း ရဲတပ်ဖွဲ့ဝင်များနှင့် လူနှစ်ဦး စကားများနေချိန်မှ စ၍ ဘေးနားရှိ ပတ်ဝန်းကျင် လူများမှလည်း စိတ်ဝင်တစား ရှိခဲ့ကြောင်း၊ အခင်းဖြစ်ပွားချိန်တွင် လူနှစ်ယောက်ရှိသည့် အထဲမှ တစ်ဦးဖြစ်သူက “ဆိုင်ကယ်လိုင်စင်က အိမ်မှာရှိတယ်။ ချလံဖြတ်စရာ မလိုဘူးပြောတာ နားမလည်ဘူးလား”ဟု အော်ပြောနေသည့် အသံများကိုလည်း ကြားရကြောင်း၊ ထိုအသံများကြောင့် ယာဉ်ထိန်း ရဲတပ်ဖွဲ့ဝင်များ ရောက်ရှိလာခဲ့ခြင်း ဖြစ်ကြောင်း အမှတ်(၁) ရဲစခန်း တာဝန်ရှိသူမှ ပတ်ဝန်းကျင်ရှိ မျက်မြင်သက်သေများ၏ ထွက်ဆိုချက်များ ပြောကြားခဲ့သည်။
“ကျွန်တော်တို့ သိတာက လူက လိုင်စင်ပါတယ်။ ဆိုင်ကယ် လိုင်စင်က ပျောက်နေတဲ့ အချိန်မှာ ဖမ်းမိတော့ ချလံဖြတ်ခိုင်းတာကို မဖြတ်ဘဲ ယာဉ်မောင်းလိုင်စင်ကို သိမ်းတယ်။ အဲ့ဒီမှာ လှမျိုးထွန်းက သူ့အစ်ကိုကို သွားခေါ်ပြီး လာညှိတယ်။ ရဲတပ်ဖွဲ့က သိမ်းထားတဲ့ ချလံကို ပြန်တောင်းတာ မရဘူး အခြေတင် စကားများပြီး ရုန်းရင်းဆန်ခတ် ဖြစ်ကုန်ကာ ညီဖြစ်တဲ့သူက ယာဉ်ထိန်းရဲကို စထိုးတယ်။ အစ်ကိုဖြစ်တဲ့ သူက တားသေးတယ်။ ယာဉ်ထိန်းရဲ အဖွဲ့က လူအင်အား တောင့်တင်းတယ်။ အဲဒီထဲကမှ ကျော်ဇင်ဦးက ယူနီဖောင်း ချွတ်ပြီးတော့ နောက်က အဖွဲ့ဝင်တွေကလည်း ညီဖြစ်တဲ့ သူကို ၀ိုင်းထိုးတယ်။ သူတို့က အုပ်စုများတဲ့ အတွက် ဒေါက်တာ လှစိုးထွန်းက ပြန်မလုပ်နဲ့တော့ ထိုးတဲ့သူတွေကို ဖုန်းနဲ့ ဓာတ်ပုံ ရိုက်ပြီးရင် ပြန်မယ်ဆိုပြီး ဒေါက်တာ လှစိုးထွန်းက သူ့ညီကို ပြောပြီး သူ့ညီက ဓာတ်ပုံရိုက်ပြီး လှည့်အပြန်မှာ ဒေါက်တာလှစိုးထွန်း တို့ဆီက ဖုန်းကင်မရာကို ယာဉ်ထိန်း ရဲတွေက ပြန်လုတယ်။ ပြီးတော့ ဒုတိယအကြိမ် အုပ်စုလိုက် သူ့ညီကို ၀ိုင်းထိုးကြတယ်”ဟု တရားခံဟု စွပ်စွဲခံထားရသူ ဒေါက်တာလှစိုးထွန်း၏ သူငယ်ချင်းဖြစ်သူက ရှင်းပြခဲ့သည်။
ထို့နောက် ဒေါက်တာ လှစိုးထွန်း အနေဖြင့် ညီဖြစ်သူ ကိုလှမျိုးထွန်းအား ယာဉ်ထိန်း ရဲတပ်ဖွဲ့မှ ၀ိုင်းဝန်းထိုး နေသည်ကို မခံနိုင်တော့ဘဲ အသင့်ပါလာသော ဓားအား ထုတ်လိုက်စဉ် တခြားယာဉ်ထိန်း ရဲတပ်ဖွဲ့ဝင်များ နောက်ဆုတ်သွားပြီး ရဲတပ်သား ကျော်ဇင်ဦး အသက်(၂၅)နှစ် မှာတော့ ရုန်းရင်းဆန်ခတ် အရှိန်ဖြင့် နောက်သို့ လဲကျသွားစဉ် ဒေါက်တာလှစိုးထွန်းမှ ဓားဖြင့် ထိုးခဲ့ခြင်းဖြစ်သည်ဟု ၄င်းက ဆက်လက်ပြောသည်။
လူရမ်းကားမဟုတ်
“ကျွန်တော့် သူငယ်ချင်းက လူရမ်းကား တစ်ယောက်လည်း မဟုတ်ပါဘူး။ အခုချိန်မှာ မှုခင်းတွေ ဖြစ်နေတဲ့အချိန်လည်း ဖြစ်တယ်။ နောက်ပြီး သူ့ညီ လာခေါ်တဲ့ အချိန်မှာ ဓားကို ယူသွားတယ် ဆိုတာကလည်း တစ်စုံတရာ အန္တရာယ် ဖြစ်လာခဲ့ရင် လူတစ်ယောက်ကို ဟန့်တားနိုင်ဖို့ အတွက် ယူသွားတာပါ။ သတ်ချင် ဖြတ်ချင်စိတ်နဲ့ ယူသွားတာ မဟုတ်ဘူးလို့တော့ ထင်ပါတယ်” ဒေါက်တာလှစိုးထွန်း၏ သူငယ်ချင်းဆိုသူ တစ်ဦးကလည်း ပြောခဲ့သည်။
တရားခံဟု စွပ်စွဲခံရသူ ဒေါက်တာ လှစိုးထွန်းမှာ အသက် (၃၀)ခန့်ရှိ ဆရာဝန်တစ်ဦး ဖြစ်ကာ အသက် တစ်နှစ် နီးပါးအရွယ် သားသမီးတစ်ဦး ရှိကြောင်းနှင့် သူ၏ ဇနီးဖြစ်သူမှာလည်း ဆရာဝန်မ တစ်ဦးဖြစ်ကြောင်း သိရသည်။
နှစ်ဖက်စလုံးမှားခဲ့သလား
ပြည်သူတစ်ယောက် အနေဖြင့်လည်း ပြည်သူ တစ်ယောက်၏ ကျင့်ဝတ်နှင့်အညီ ပြဿနာ တစ်ခုအား အေးဆေး တည်ငြိမ်စွာဖြင့် မဖြေရှင်းဘဲ ပြည်သူ့ကျင့်ဝတ်နှင့် မညီသည့် လက်နက်ကိုင် ဆောင်လာခြင်း၊ ယာဉ်ထိန်း ရဲတပ်ဖွဲ့၏ ဥပဒေမဲ့ လုပ်ဆောင်မှု ဖြစ်ခဲ့ပါကလည်း ဥပဒေနဲ့အညီ တိုင်ကြားမှု ပြုလုပ်နိုင်ခြင်း မပြုဘဲ ဥပဒေမဲ့ ဖြေရှင်းခဲ့ခြင်းကြောင့် ပြည်သူ့ကျင့်ဝတ်နဲ့ မညီသည့် အတွက် မှားယွင်းသည်ဟု ယူဆမိကြောင်း၊ ယာဉ်ထိန်း ရဲတပ်ဖွဲ့ အနေနှင့်လည်း ဥပဒေ ချိုးဖောက်သူအား မည်သည့်အတွက် ဖမ်းဆီးခြင်း ဖြစ်ကြောင်း တာဝန်အရ အရေးယူမှုကို ပြေလည် နားလည်မှု ရှိစေရန် သေချာစွာ ရှင်းပြခြင်း မရှိခဲ့ကြောင်း၊ ဥပဒေနဲ့အညီ အရေးယူမှု ပြုရမည့်အစား ယူနီဖောင်းချွတ်ပြီး လက်တုံ့ပြန်ခဲ့ခြင်း၊ မိမိတို့ ရဲတပ်ဖွဲ့ အနေဖြင့် ဒီမိုကရေစီ စနစ်သို့ ကျင့်သုံးနေသည့် နိုင်ငံ ဖြစ်သည့်အတွက် ဥပဒေနှင့်အညီ မှန်ကန်စွာ ဆောင်ရွက်ပါက မည်သို့ပင် ဓာတ်ပုံ ရိုက်ကူးပါစေ မတားမြစ်သင့်ကြောင်း၊ ထို့ကြောင့် ယာဉ်ထိန်းရဲ အနေဖြင့်ကလည်း ၀န်ထမ်းကျင့်ဝတ်နှင့် မညီညွတ်ခြင်းကြောင့် မှားယွင်းခဲ့ခြင်း ဖြစ်သည်ဟု ယင်းဖြစ်စဉ်ကို သိရှိ တွေ့ကြုံခဲ့သူတို့က သုံးသပ်ကြ သည်။
မည်သို့ပင်ဆိုစေ ပြဿနာကို စတင်အခြေခံခဲ့သည့်နှစ်ဦးနှစ် ဖက်က နားလည်မှု၊ ခွင့်လွှတ် သည်းခံမှုများ မပြုလုပ်နိုင်ခဲ့ခြင်း၏ နောက်ကွယ်တွင်တော့ တစ်ဦးက အသက်ကို ပေးဆပ်လိုက်ရပြီး နောက်တစ်ဦးက တရားဥပဒေ၏ အဆုံးအမကို ခံယူရန် အခြေအနေသို့ ရောက်ရှိခဲ့ပြီ ဖြစ်သည်။
0 comments:
Post a Comment